Ózbekstan Respublikası Prezidentiniń 2024-jıl 23-sentyabrdegi PQ-330-sanlı qararı menen “Kámbaǵallıqtan abadanlıqqa qaray” baǵdarlaması qabıl etilgen edi. Bul baǵdarlamanıń 6-bántinde máhálleler infrastrukturasın rawajlandırıw sheńberinde xalıqtıń qıytaq jerlerin suw menen támiyinlew imkaniyatın jaqsılaw boyınsha da bir qatar wazıypalar belgilengen.

     Bul baǵdarda Qaraqalpaqstan Respublikası Ministrler Keńesi tárepinen Adresli dizim tastıyıqlanıp, onda 89 máhálle hám awıl puqaralar jıyınlarındaǵı xalıqtıń qıytaq jerlerin kepillikli suw menen támiyinlew boyınsha ámelge asırılıwı zárúr bolǵan jumıslar belgilendi.

    Búgingi kúnde, 33 obekttiń joybarlaw-smeta hújjetleri islep shıǵılıp, Mámleketlik ekspertizaǵa usınılǵan bolsa, qalǵan 56 obektte joybarlaw-smeta hújjetleri islep shıǵılmaqta. Sonday-aq, 7 obektte qurılıs-montajlaw jumısları baslandı.

     Házirgi waqıtta aymaqlardaǵı barlıq sistemalı shólkemlerdiń basshılarına “Kámbaǵallıqtan abadanlıqqa qaray” baǵdarlaması tiykarında ámelge asırılatuǵın jumıslardı jedellestiriw, egis máwsiminde xalıqtıń qıytaq jerlerine suw támiynatın jaqsılaw ilajların kóriw boyınsha tapsırmalar berildi.

Qaraqalpaqstan Respublikası

Suw xojalıǵı ministrligi Baspasóz xızmeti