Qaraqalpaqstan nasos stanciyaları hám energetika basqarması tárepinen Nókis rayonında jaylasqan “Kegeyli-2” nasos stanciyasında nasos stanciyalarınıń nátiyjeliligin arttırıw, elektr energiyasın únemlew hám 2026-jıldaǵı tiykarǵı wazıypalardı belgilewge baǵıshlanǵan gezektegi seminar shólkemlestirildi.
Seminarǵa Qaraqalpaqstan Respublikası Suw xojalıǵı ministriniń birinshi orınbasarı A.Urazinbetov, Qaraqalpaqstan nasos stanciyaları hám energetika basqarması baslıǵı wazıypasın waqtınsha atqarıwshı N.Aralbaev, “Suw jetkerip beriw xızmeti” mámleketlik mákemeleriniń direktorları, sonday-aq, nasos stanciyalarınıń baslıqları hám jumısshı-xızmetkerleri qatnastı.
Bul seminarda 2025-jıl dawamında erisilgen jetiskenlikler, jol qoyılǵan kemshilikler hám olardı saplastırıw ilajları boyınsha hár tárepleme pikir alısıldı.
Sonday-aq, nasos stanciyalarında elektr energiyasın únemlew, nasos agregatlarınıń isenimli islewin támiyinlew, elektr dvigatellerdi turaqlı texnikalıq tekseriwden ótkeriw hám energiya únemlewshi úskenelerdi engiziw máseleleri dodalandı.
Seminar dawamında nasos stanciyalarında elektr energiyasınan aqılǵa uǵras paydalanıw, nasos agregatların óz waqtında ońlaw hám texnikalıq xızmet kórsetiw, sonday-aq, olardıń úzliksiz hám nátiyjeli islewin támiyinlew máseleleri ayrıqsha atap ótildi. Sonıń menen birge, nasos stanciyaları aymaǵında shólkemlestirilgen járdemshi xojalıqlarda ámelge asırılıp atırǵan jumıslar da kórip shıǵılıp, juwapker xızmetkerlerge tiyisli kórsetpeler hám usınıslar berildi.
Maǵlıwmat beriliwinshe, Qaraqalpaqstan nasos stanciyaları hám energetika basqarması qaramaǵında jámi 221 nasos stanciyası hám 481 nasos agregatı bar. Sonnan Nókis rayonında 24 nasos stanciyası hám 56 nasos agregatı jumıs alıp barıp, 6336 gektar egislik maydanların suw menen támiyinlewge xızmet etpekte.
2025-2026-jıllar gúzgi-qısqı máwsiminde jámi 13 dana nasos agregatın ońlaw rejelestirilgen bolıp, ámelde 10 dana nasos agregatı tolıq ońlanıp, shor juwıw máwsimine tayar jaǵdayǵa keltirilgen.
Seminarda Qaraqalpaqstan Respublikası Suw xojalıǵı ministrliginiń mámleketlik-jeke menshik sheriklik bólimi baslıǵı E.Davletovtıń nasos stanciyaların mámleketlik-jeke menshik sheriklik shártleri tiykarında jeke menshik sektor basqarıwına beriw boyınsha ámelge asırılǵan jumıslar hám keleshektegi wazıypalar boyınsha málimlemesi tıńlandı. Bul baǵdarda ámelge asırılatuǵın jumıslar dodalanıp wazıypalar belgilep alındı.
Ilaj juwmaǵında bunday seminarlar – barlıq baǵdardaǵı jumıslarımızdıń nátiyjeliligin bunnan bılay da arttırıw, energiya resurslarınan aqılǵa uǵras paydalanıw hám suw támiynatı sistemasınıń turaqlı islewin támiyinlewge xızmet etiwi zárúrligi ayrıqsha atap ótildi.
Qaraqalpaqstan Respublikası
Suw xojalıǵı ministrligi baspasóz xızmeti