SUWǴARIW USILLARI BOYINSHA ILIMIY TÁJIRIYBE DAWAM ETPEKTE
Irrigaciya hám suw mashqalaları ilimiy-izertlew institutı janındaǵı Qaraqalpaqstan regionallıq orayınıń ilimpazları tárepinen awıl xojalıǵında suw resurslarınan nátiyjeli paydalanıw, suw tamtarıslıǵı sharayatında eginlerdi suwǵarıwdıń optimal usılları menen rejimlerin islep shıǵıwǵa qaratılǵan ilimiy izertlewler alıp barılmaqta.
Házirgi waqıtta oray tárepinen “Qurǵaqshılıq aymaqlarında suw jetispewshiligin jumsartıw, zamanagóy suwdı únemleytuǵın texnologiyalar tiykarında awıl xojalıǵı eginlerin suwǵarıw tártibi hám rejimlerin islep shıǵıw” atamasındaǵı ilimiy joybar ámelge asırılmaqta. Agrobank tárepinen qarjılandırılıp atırǵan bul joybar sheńberinde atız sharayatında hár qıylı suwǵarıw texnologiyalarınıń nátiyjeliligi úyrenilmekte.
Joybar sheńberinde ámelge asırılıp atırǵan izertlewlerdiń nátiyjelerine baǵıshlanǵan ilimiy-ámeliy seminar usı jıldıń 18-sentyabr kúni ótkerildi.
Onda Agrobank qánigeleri, Qaraqalpaqstan Respublikası suw xojalıǵı sistemasındaǵı “Kattaǵar-Bozataw” irrigaciya sistemaları basqarması, Nókis rayonı Suw jetkerip beriw xızmeti mámleketlik mákemesi, rayonlıq melioraciya ekspediciyası qánigeleri, fermer xojalıqları hám aymaqlıq oray izleniwshi doktorantları qatnastı.
Seminarda suwǵarıw suwınan aqılǵa uǵras paydalanıw, onı jetkerip beriw hám bólistiriw nátiyjeliligin arttırıw, eginlerdiń suwǵa bolǵan talabın anıqlaw, sonday-aq, topıraq hám meliorativlik sharayatlardı esapqa alǵan halda suwǵarıw rejimlerin belgilew máseleleri dodalandı.
Sonday-aq, tamshılatıp, diskret hám jawınlatıp suwǵarıw sıyaqlı zamanagóy suwdı únemleytuǵın texnologiyalardıń imkaniyatları, olardı qollanıw shártleri hám suw jetispewshiligi sharayatındaǵı áhmieti haqqında maǵlıwmatlar berildi.
Seminarda ISMITI laboratoriya baslıǵı G.Paluasheva hám ISMITI Qaraqalpaqstan aymaqlıq orayınıń direktorı S.Kurbanbaev shıǵıp sóylep, ilimiy joybardıń maqset hám wazıypaları, ámelge asırılıp atırǵan izertlewler hám olardıń ámeliy áhmietine toqtap ótti.
Izertlewlerde eginlerdiń ıǵallıqqa bolǵan talabın, topıraq ıǵallıǵınıń dinamikasın hám basqa da faktorlardı esapqa alǵan halda suwǵarıwdıń optimal múddeti, norması hám dáwirliligin anıqlawǵa ayrıqsha itibar qaratılmaqta.
Joybar orınlawshıları – regionallıq oray ilimpazları O.Karimova, T.Kalimbetov hám G.Aminovalar tárepinen dala sharayatında alıp barılıp atırǵan izertlewlerdiń nátiyjeleri qatnasıwshılar itibarına usınıldı.
Atap aytqanda, O.Karimova tamshılatıp suwǵarıw texnologiyası haqqında sóz etip, suwdı ósimliklerdiń tamır bólegine maqsetli jetkerip beriw, suwǵarıw waqtı hám normasın tártipke salıw imkaniyatları haqqında maǵlıwmat berdi.
Seminarda T.Kalimbetov diskret suwǵarıw usılınıń abzallıqları, suwdı belgilengen norma hám múddetlerde jetkerip beriw imkaniyatları haqqında aytıp, usı texnologiyadan paydalanıwdıń ámeliy táreplerine toqtap ótti.
Sonday-aq, G.Aminova jawınlatıp suwǵarıw texnologiyasınıń ózine tán ózgeshelikleri, eginlerdi suw menen támiyinlewdegi imkaniyatları hám onı ámeliyatta qollanıw shártleri haqqında maǵlıwmat berdi.
Izertlewler sheńberinde paxta jetistiriwde tamshılatıp hám diskret suwǵarıw, ǵálle jetistiriwde bolsa jawınlatıp suwǵarıw texnologiyalarınan paydalanǵan halda eginlerdiń suwǵarıw rejimleri úyrenilmekte.
Seminar dawamında zamanagóy suwǵarıw texnologiyaların ámeliyatqa engiziw, suwǵarıw rejimlerin jetilistiriw hám suw resurslarınan nátiyjeli paydalanıw máseleleri boyınsha pikir alısıldı.
Qaraqalpaqstan Respublikası
Suw xojalıǵı ministrligi baspasóz xızmeti