Qaraqalpaqstan Respublikasında usı qıs máwsiminde suwǵarıw ilajları derlik bolmaptı hám bul kanallardı rekonstrukciyalaw, betonlastırıw ushın qolaylı imkaniyat bolıp esaplanadı.

     Bizge belgili, Ózbekstan Respublikası Ministrler Kabinetiniń 2025-jıl 21-oktyabrdegi 660-sanlı qararına tiykar Nókis rayonındaǵı “Sorali,” Shomanaydaǵı “Ak jap,” Taqıyatastaǵı “Eski Keneges” kanalında (2-basqısh), Shımbaydaǵı “Taǵ jap” kanalları rekonstrukciya jumısların ámelge asırıw belgilengen.

     – Bul baǵdarda ámelge asırılıp atırǵan jumıslar tallanıp, obektlerdegi jumıslardı jedellestiriw boyınsha buyırtpashı hám qurılıs shólkemlerine tiyisli kórsetpeler berildi, – deydi “Suw xojalıǵı qadaǵalawı” inspekciyasınıń bas qánigesi I.Dexkanov. – Házirgi waqıtta jumıs islenip atırǵan obektlerde qıstıń qolaysız, suwıq kúnlerinen aldın múmkin bolǵanınsha kóbirek bólegin betonlaw maqsetinde texnika hám jumısshı kúshlerin kóbirek tartıwdıń barlıq ilajları kórilmekte.

     Maǵlıwmat ushın joqarıda keltirilgen Húkimet qararı tiykarında 2025-2026-jıllar dáwirinde 4 kanaldıń 44 kilometr bóleginde betonlastırıw jumısların ámelge asırıwǵa 81 mlrd sum qarjı ajıratıw názerde tutılǵan. Sonnan 2025-jıl ushın 12 mlrd 150 mln sum avans qarjıları jumıstı bólip alıp islewshi shólkemlerge ajıratılıp, barlıq obektlerde jumıslar qızǵın alıp barılmaqta.

Qaraqalpaqstan Respublikasında

Suw xojalıǵı ministrligi baspasóz xızmeti