Nókis qalasında Ózbekstan Respublikası Suw xojalıǵı ministri Sh.Xamraevtıń basshılıǵında “Kámbaǵallıqtan abadanlıqqa qaray” baǵdarlamasınıń orınlanıwın támiyinlewge baylanıslı máseleler boyınsha májilis ótkerildi.
Májilis aldında Suw xojalıǵı ministri Sh.Xamraev Prezidentimizdiń baslaması menen elimizde kámbaǵallıqtı qısqartıw ulıwma milliy háreketke aylanǵanın atap ótti. Mámleketimiz basshısı 2023-jıldıń 11-sentyabr kúni kámbaǵallıqtı qısqartıw jumısların keyingi sapa basqıshına alıp shıǵıw máselelerin dodalaw boyınsha ótkergen videoselektor májilisinde kámbaǵal shańaraqlardıń 83 procentinde úlken qıytaq jer bar ekenligin, biraq olardıń 62 procentinde suw mashqalası bar ekenligin keltirip ótti. Bul negizinde biz suwshılardı da qıynap kiyatırǵan mashqala edi.
Aradan kóp ótpey Prezidentimiz tárepinen kámbaǵallıqtı qısqartıw hám xalıqtıń turmıs abadanlıǵın arttırıwǵa baylanıslı pármanı jáne “Kámbaǵallıqtan abadanlıqqa qaray” baǵdarlamasın tastıyıqlaw boyınsha ayrıqsha qarar qabıl etilip, bul baǵdarda ámelge asırılatuǵın ilajlar belgilendi.
Bul baǵdarlama sheńberinde Qaraqalpaqstan Respublikasındaǵı 89 máhálle hám awıl puqaralar jıyınlarında xalıqtıń qıytaq jerlerin kepillikli suw menen támiyinlew názerde tutılǵan. Suw xojalıǵınıń barlıq dárejedegi juwapker basshıları kámbaǵallıqtı qısqartıw ulıwma milliy háreketine múnásip úles qosıwı, máhállelerge suw jetkeriw jumısına jeke juwapkershilik hám joqarı juwapkershilik sezimi menen islewi kerek, dedi Shavkat Hamraev.
Sın kózqaras ruwxında ótken májiliste “Kámbaǵallıqtan abadanlıqqa qaray” baǵdarlaması sheńberinde xalıqtıń qıytaq jerin suw menen támiyinlewge qaratılǵan ilajlardı ámelge asırıw boyınsha jumısshı topar dúzildi.
“Suwxojalıqnazorat” inspekciyasınıń baslıǵı R.Raximov basshılıǵındaǵı jumısshı topar quramına Suw xojalıǵı ministrligi, “Ámiwdárya” basseyni suw xojalıǵı birlespesi hám usı birlespeniń Tómengi dárya basqarmasınıń juwapkerleri, Irrigaciya sisteması basqarmaları, Nasos stanciyaları hám energetika basqarmaları, Jaǵalıq qorǵawshı dambalar hám ózekti tártipke salıwshı qurılmalar basqarması, Aralboyı delta basqarmasınıń basshıları hám juwapker xızmetkerleri jáne rayonlardaǵı “Suw jetkerip beriw xızmeti” mámleketlik mákemesiniń direktorları kirgizildi. Olar Qaraqalpaqstan Respublikasınıń 17 aymaǵına baǵdarlamanıń orınlanıwına juwapker wákiller etip biriktirildi.
Májiliste “Suwxojalıqnazorat” inspekciyasınıń baslıǵı R.Raximov, Qaraqalpaqstan Respublikası Suw xojalıǵı ministri B.Juzbaev shıǵıp sóylep, baǵdarlama sheńberinde belgilengen ilajlardı óz múddetlerinde orınlawdıń barlıq ilajları kóriletuǵının hám búgin dúzilgen jumısshı topar aǵzaları da aymaqlarda nátiyjeli jumıs shólkemlestiriwi zárúrligin atap ótti.
Májiliste suw xojalıǵında alıp barılıp atırǵan jumıslar, kanallardı betonlaw, suwdı únemleytuǵın texnologiyalardı engiziw, qorǵaw zonalarında járdemshi xojalıqlar shólkemlestiriwge qaratılǵan máseleler de keń túrde dodalandı. Sonday-aq, keyingi 2 aydıń ózinde Qaraqalpaqstandaǵı suw xojalıǵı shólkemlerine jańa ekskavator hám kanallardı betonlawda qollanılatuǵın “Karmiks” sıyaqlı jámi onnan aslam arnawlı texnikalar alıp kelingeni atap ótilip, endi usı texnikalardan nátiyjeli paydalanǵan halda shólkemlerdiń rawajlandırıw qorına qarjı túsirip, suwshılardıń dáramatın arttırıw boyınsha da tapsırmalar berildi.
Suw xojalıǵı ministri Sh.Xamraev búgin, yaǵnıy 21-fevral kúni “Kámbaǵallıqtan abadanlıqqa qaray” baǵdarlaması sheńberinde Ámiwdárya rayonındaǵı “Chaykul” máhállesindegi salmalardı betonlaw jumısları menen jaqınnan tanıstı. Juwapkerlerge bul baǵdardaǵı jumıslardı jedellestiriw boyınsha tapsırmalar berdi.
Ǵ.Atajanov,
Qaraqalpaqstan Respublikası Suw xojalıǵı ministrliginiń baspasóz xatkeri