Qaraqalpaqstan Respublikası Suw xojalıǵı ministrliginde mámleketlik baǵdarlamalar sheńberinde kanallardı rekonstrukciyalaw, betonlastırıw hám gidrotexnikalıq obektlerdi ońlaw boyınsha ámelge asırılıp atırǵan jumıslar dodalandı.

Májiliste “Suwxojalıqnazorat” inspekciyası baslıǵınıń orınbasarı Z.Irisbaev, Qaraqalpaqstan Respublikası suw xojalıǵı ministriniń orınbasarı T.Madreymov, “Qaraqalpaqstansuwqurılısinvest” mámleketlik mákemesiniń direktorı Allayar Qaypov hám suw xojalıǵı obektlerinde qurılıs hám rekonstrukciya jumısların alıp barıp atırǵan jumıstı bólip alıp islewshi shólkemlerdiń basshıları qatnastı.

Dodalaw dawamında “Qaraqalpaqstansuwqurılısinvest” mámleketlik mákemesiniń direktorı Allayar Qaypov ámelge asırılıp atırǵan qurılıs-ońlaw jumıslarınıń aǵımdaǵı jaǵdayı, belgilengen reje hám grafiklerdiń orınlanıwı, sonday-aq, kanallardı betonlaw jumıslarında belgilengen múddetlerden artta qalıp atırǵan obektler haqqında málimleme berdi.

Anıqlanǵan kemshilikler hám jumıslardıń keshigiwine sebep bolıp atırǵan mashqalalar hár tárepleme dodalanıp, olardı jedellik penen saplastırıw, qurılıs processlerin belgilengen grafik tiykarında shólkemlestiriw hám obektlerde jumıs pátin arttırıw boyınsha juwapkerlerge tiyisli tapsırmalar berildi.

Óz gezeginde, jumıstı bólip alıp islewshi shólkemlerdiń basshıları bar kemshiliklerdi qısqa múddetlerde saplastırıw, qosımsha jumısshı kúsh hám arnawlı texnikalardı tartıw arqalı jumıslardı jedellestiriw jáne belgilengen múddetlerde sapalı orınlaw ilajların kóretuǵının bildirdi.

Májiliste mámleketlik baǵdarlamalar sheńberinde ámelge asırılıp atırǵan joybarlardıń óz waqtında hám sapalı juwmaqlanıwın támiyinlew, suw xojalıǵı obektleriniń nátiyjeli islewin jaqsılaw jáne suw resurslarınan aqılǵa uǵras paydalanıwda úlken áhmiyetke iye bolǵan infrastrukturanı rawajlandırıw baǵdarında belgilengen wazıypalardıń orınlanıwına ayrıqsha itibar qaratıldı.

Qaraqalpaqstan Respublikası

Suw xojalıǵı ministrligi baspasóz xızmeti