Húrmetli kásiplesler!
Suw xojalıǵı sistemasınıń pidayı xızmetkerleri!
Búgin Sizlerge bárshemiz ushın úlken áhmietke ie bolǵan másele – korrupciyaǵa qarsı gúresiw, onıń aldın alıw boyınsha múrájat etpektemen!
Biz bilemiz, mámleketimizde suwdan nátiyjeli paydalanıw, suwdı únemleytuǵın texnologiyalardı engiziw, suwǵarıw sistemaların modernizaciyalaw hám suw xojalıǵın basqarıwdıń innovaciyalıq usılların qollanıw búgingi kúnde aldımızda turǵan eń áhmietli másele, Prezidentimizdiń taraw xızmetkerleri aldına qoyǵan qatań talabı!
Bársheńizdiń xabarıńız bar, elimizde korrupciyaǵa qarsı gúresiw – mámleketlik siyasattıń tiykarǵı baǵdarlarınan birine aylandı. Prezidentimizdiń sózi menen aytqanda, korrupciya – reformalar jolındaǵı eń úlken tosqınlıq hám irkinish.
Keyingi jılları jámietimizde korrupciya mashqalasın jámiechiliktiń dodalawına alıp shıǵatuǵın ashıq sistema, ashıq ortalıq jaratıldı. Ásirese, ǵalaba xabar qurallarınıń bul baǵdardaǵı ornı hám tásiri artıp barmaqta. Hár kúni, kún ara lawazım wákilliginen paydalanǵanlar, kimnińdur isenimine kirip aldawshılıq jolı menen úlken muǵdardaǵı pulların ózlestirmekshi bolǵanlar, yamasa qaysıdur juwapker tárepinen para beriwshiniń mápi ushın qaysı háreketlerdi orınlaw yamasa orınlamaw esesine para alınǵanı haqqındaǵı xabarlardı ǴXQ hám rásmiy sociallıq tarmaqlarda baqlap barmaqtamız.
Álbette, bul jaǵdaylar bárshemizdi sergeklikke shaqırıwı, qaraqalpaqstanlı suw xojalıǵı xızmetkerleriniń jumısına baylanıslı bunday kewilsiz jaǵdaylar júz bermewi ushın kúndelikli jumısımızdı belgilengen nızam hám qarar talapları dárejesinde alıp barıwımız shárt hám zárúr.
Húrmetli suwshılar!
Suw xojalıǵında korrupciya jaǵdayların azaytıw baǵdarında kóplegen sistemalı jumıslar ámelge asırılmaqta. Atap aytqanda, Suw xojalıǵın korrupciyadan jıraq tarawǵa aylandırıw ushın keń kólemli jumıslar alıp barılmaqta. Usı jerde, barlıq suwshılar “korrupciyadan jıraq tarawǵa aylandırıw,” degen sózdiń mánisin tereń ańlawın sorar edim. Suwdıń esabın júrgiziw bola ma, qurılıs, kanallardı tazalaw bola ma bárqulla júregimizden ótkerip, sezinip turıwımız kerek.
Bıyılǵı suwǵarıw máwsiminde dáryamızdan jeterli muǵdarda suw kelip turǵanına mıń shúkir. Biraq, rayonlardaǵı ayırım juwapkerler rayon shegarasına jetkerilgen suw muǵdarın ádil bólistirmewi nátiyjesinde alıs awıllarǵa suw keshletip barıwına, xalıqtıń narazılıǵına sebep bolmaqta.
Durıs, Qaraqalpaqstannıń suw resursların basqarıw basqa regionlardan ózgeshe hám kanallardıń tiykarǵı bólegi topıraqlı bolǵanlıqtan suw joǵaltıwları salıstırmalı kóbirek. Biraq, usınday faktorlardı esapqa alǵan jaǵdayda da alınǵan suwǵa salıstırǵanda esabatta úlken parıq bolmawı kerek. Usı kózqarastan “Suw jetkerip beriw xızmeti” mámleketlik mákemesiniń basshıları, juwapker xızmetkerleri suwdıń esabın ashıq-aydın júrgiziwi, yaǵnıy alınǵan suwdı salıq esabatına durıs kirgizip barıwı zárúr. Bolmasa, bul jerde korrupciya belgileri bar ekenligi boyınsha gúman payda bolıwı, olardıń jumısı ústinen úyreniw ótkerilip, jumısına baha beriwge sebep bolıwı múmkin.
Sebebi, Prezidentimiz Shavkat Mirziyoevtiń atap ótkenindey: “Reformalar jolındaǵı eń úlken tosıq hám irkinish – bul korrupciya bolıp esaplanadı. Korrupciya sonday jaman illet, ol xalıqtıń mámleketke, Konstituciya hám nızamlarǵa isenimine zıyan keltiredi, turaqlı rawajlanıw hám qáwipsizlik ushın qatań qáwipke aylanadı.”
Keyingi jılları suw xojalıǵında sanlı texnologiyalardı keńnen qollanǵan halda suw resursların basqarıw hám suw esabın júrgiziwdiń ashıq-aydın sisteması jolǵa qoyılmaqta. Sonday-aq, suw xojalıǵı obektlerin qurıw hám rekonstrukciyalaw baǵdarındaǵı jumıslar, ámelge asırılatuǵın joybarlar “Ashıq-aydın qurılıs” baǵdarlaması engizilgennen keyin bul tarawda da unamlı ózgerisler sezildi, álbette.
Sonıń menen birge, suw xojalıǵı tarawına maman kadrlardı tartıw hám olardı lawazımǵa tayınlawda da insan faktorınıń qatnasıwı keskin azaytıldı. Sonıń ishinde, bul baǵdarda qabıl etilgen normativlik hújjetler tiykarında tarawda mápler soqlıǵısıwı, nepotizim hám basqa da unamsız jaǵdaylardıń aldın alıw maqsetinde bos jumıs orınları haqqındaǵı málimlemeler bárqulla tiyisli saytlar arqalı keń jámiyetshilikke járiyalanıp kelinbekte. Sonıń ishinde, ministrlik hám sistemalı shólkemlerdegi mámleketlik xızmetker esaplanatuǵın lawazımlarǵa jumısqa qabıl etiletuǵın talabanlardıń hújjetleri Ózbekstan Respublikası Prezidenti janındaǵı Mámleketlik xızmetti rawajlandırıw agentligi tárepinen vacancy.argos.uz saytı arqalı qabıl etiledi.
Jumısqa qabıl etiw procesi de tiyisli platforma arqalı test sınaqları hám basqa da mamanlıq talapları tiykarında ámelge asırıladı. Sonday-aq, rayonlardaǵı suw xojalıǵı shólkemleri xızmetkerlerindegi vakant orınlarǵa jumısqa qabıllaw da Ózbekstan Respublikası Kámbaǵallıqtı qısqartıw hám bántlik ministrliginiń aymaqlıq bólimleri arqalı ashıq tańlaw tiykarında ámelge asırılıp kelinbekte. Ashıq tańlawda mamanlıq talabı, jumıs stajı hám basqa da kórsetkishlerine tiykarlanıp tuwra kelgen jaǵdayda basqıshpa-basqısh ámelge asırıladı.
Biraq, tilekke qarsı, suw resurslarınan paydalanıw tarawında da ayırım unamsız jaǵdaylar – korrupciya, byurokratiya, mápgóylik sıyaqlı illetler júzege kelmekte. Bul illet tek ǵana sistemanı jemiredi emes, al xalqımızdıń isenimin, pidayı qánigelerdiń miynetine bolǵan itibardı da tómenletedi.
Suw xojalıǵı tarawı jámiet hám ekonomikanıń strategiyalıq tarmaqlarınan biri sıpatında, óz jumısında pútkilley ashıq-aydın, hadal hám nátiyjeli bolıwı shárt!
Korrupciyaǵa qarsı gúresiw – bul tek ǵana qadaǵalawshı uyımlardıń wazıypası emes. Bul hár birimiz – basshı ma, injener me, qánige me yamasa mirap pa – hámmemizdiń jeke minnetimiz hám juwapkershiligimiz!
Hadallıq – bul hár bir suw xojalıǵı sisteması xızmetkeriniń “mirát qaǵazı” bolıwı kerek. Pidayı, hadal hám óz wazıypasına hújdanlı qatnas jasaytuǵın insanlar bar jerde sistema turaqlı, nátiyjeli hám eń áhmietlisi xalıq razı boladı.
Itibarıńız ushın raxmet!