Qaraqalpaqstan Respublikası, ulıwma Aralboyı regionı elimizdiń basqa aymaqlarınan ózgeshe túrde kanallardan paydalanıw dáwiri kóbirek, yaǵnıy suwǵarıw dáwiri menen birge shor juwıw dáwiri de bar. Bul dáwirde de kanallarda suwdıń bolıwı esabınan suw shıǵınların azaytıwǵa qaratılǵan ilaj – kanallardı betonlawǵa gúz hám báhár máwsiminde az waqıt qaladı.

Usı faktordı esapqa alǵan qaraqalpaqstanlı suwshılar házirgi kúnde de kanallardı betonlastırıw jumısların izbe-iz dawam ettirmekte.

– Ishki kanallarǵa gezekpe-gezek suw beriwdi jolǵa qoydıq hám sol arqalı suw berilmegen kanallardı betonlaw jumısların dawam ettirip atırmız, – deydi Kegeyli rayonı “Suw jetkerip beriw xızmeti” mámleketlik mákemesi direktorınıń orınbasarı Tashkentbay Saparbaev. –

– Házirgi waqıtta “Júzimbaǵ” awıl puqaralar jıyını aymaǵındaǵı “Dáwlet nasos salma” ishki kanalında betonlaw jumısları ámelge asırılmaqta. Bul kanal suw salıǵı esabınan ótkerilgen qarjınıń 40 procenti esabınan qáliplestirilgen qarjılar esabınan betonlaw ushın zárúr bolǵan cement hám basqa da materiallar alınıp, suwshılardıń jumısshı kúshi hám texnikaları járdeminde betonlastırılmaqta. Jumıs 2 smenada shólkemlestirilip, qurılıs basında ıssı awqat hám basqa da zárúr sharayatlar jaratılǵan.

Kanallardı betonlastırıw jumısların jedellestiriwde “Suw jetkerip beriw xızmeti” mámleketlik mákemeleri alǵan arnawlı texnikalar jumıs ónimdarlıǵın arttırıwǵa xızmet etpekte. Kegeyli rayonı suwshıları usı jılı jańa ekskavator hám “Karmiks” arnawlı texnikaların alǵan edi hám kanallardı betonlastırıwda usı texnikalar qol kelmekte.

Itibarlısı, kegeylilik suwshılar hár bir kún, saattan únemli paydalanıwdıń barlıq ilajların kórmekte. Suw xojalıǵı ministrligi juwapkerleri tárepinen ishki kanallardı betonlaw baǵdarındaǵı jumıslardı barlıq rayonlarda jedel dawam ettiriw boyınsha kórsetpeler berilip, bul jumıslar qadaǵalawǵa alınǵan.

Qaraqalpaqstan Respublikası

Suw xojalıǵı ministrligi baspasóz xızmeti