Qaraqalpaqstan Respublikası Suw xojalıǵı ministrligi wákilleri Qaraózek rayonında bolıp, tarawdaǵı tiykarǵı baǵdarlar boyınsha belgilengen wazıypalardıń orınlanıwın úyrendi hám dala sharayatında ótkerilgen seminarda ámelge asırılatuǵın wazıypalar belgilendi.
Rayondaǵı “Reymqul Berdali” fermer xojalıǵınıń atızında ótkerilgen ilajda suwdı únemleytuǵın suwǵarıw texnologiyaların engiziw, suw tutınıwshılarına ajıratılǵan suw limitleri sheńberinde shártnamalar dúziw sıyaqlı máseleler dodalandı.
Seminarda 2025-jılda bar suw resurslarınan paydalanıw nátiyjeliligin arttırıw maqsetinde suw resursların suw tutınıwshıları arasında qatań bólistirilgen halda paydalanıw, suwdı únemleytuǵın texnologiyalardı engiziwdi mámleket tárepinen qollap-quwatlawdı jetilistiriw, irrigaciya sistemalarında suw joǵaltıwların azaytıw, suw resursların basqarıwǵa zamanagóy málimleme-kommunikaciya texnologiyaların engiziw sıyaqlı tiykarǵı baǵdarlar belgilep alınǵanı atap ótildi.
– Bul rayonda 2021-2024-jıllar dawamında 7 fermer xojalıǵı hám Klaster tárepinen 202,3 gektar maydanǵa tamshılatıp suwǵarıw texnologiyası engizilgen edi, – deydi Qaraqalpaqstan Respublikası Suw xojalıǵı ministrliginiń Suwdı únemleytuǵın suwǵarıw texnologiyaların engiziw boyınsha bas qánigesi Abu Qidirbaev. – Sonday-aq, 3 fermer xojalıǵı tárepinen 91,3 gektar maydanǵa jawınlatıp suwǵarıw texnologiyası engizildi.
Rayonlarda ótkerilip atırǵan bunday ilajlarda aldın qurılǵan suwdı únemleytuǵın texnologiyalardan paydalanıw jaǵdayı úyrenilip, tiyisli usınıslar, servis xızmetleri boyınsha maǵlıwmatlar berilmekte.
2025-jıldıń ótken dáwirinde Qaraózek rayonındaǵı 2 fermer xojalıǵınıń 50 gektar egislik maydanlarına 1 mlrd 250 mln sumlıq jawınlatıp suwǵarıw texnologiyaları, 2 fermer xojalıǵınıń 53 gektar maydanına 1 mlrd 325 mln sumlıq tamshılatıp suwǵarıw texnologiyaların engiziw boyınsha shártnama shártnamalar dúzilip, qarjılandırıw jumısları alıp barılmaqta. Sonday-aq, 1372 gektar jer maydanlarında lazerli tegislew jumısları orınlandı.
Ámeliy seminar tárizinde ótkerilgen ilajda Qaraqalpaqstan Respublikası Suw xojalıǵı ministrliginiń Suw jetkerip beriw xızmeti jumısın muwapıqlastırıw bólimi baslıǵı E.Turdıbaev suwdıń kúnlik esabat jurnalların júrgiziw hám hár aydıń juwmaǵı menen dúzilgen aktlerdi “Suw esabı” málimleme platformasına kirgizip barıw, usı kirgizilgen maǵlıwmatlar tiykarında salıq esaplanıwı haqqında keń túrde túsindirdi.
Qaraózek rayonı “Suw jetkerip beriw xızmeti” mámleketlik mákemesi tárepinen suw tutınıwshılarına ajıratılǵan suw limitleri hám shártnamalardıń “Suw esabı” málimleme platforması arqalı dúziliwi hám alınǵan suw muǵdarlarınıń esabın júrgiziw máseleleri dodalandı.
Qaraqalpaqstan Respublikası
Suw xojalıǵı ministrligi baspasóz xızmeti