Aldın xabar bergenimizdey, Qaraqalpaqstan Respublikası rayonlarında ishki kanallardı betonlastırıw jumısları alıp barılmaqta.

Shımbay rayonında aymaqlardaǵı kanallarǵa gezekpe-gezek suw beriw grafiklerine bola, “Tazgara” awıl puqaralar jıyını aymaǵında jaylasqan “Shaxarıq” ishki kanalına suw beriw waqtınsha toqtatılıp, betonlaw jumısları alıp barılmaqta.

-Mákememizdiń ekonomikalıq imkaniyatınan kelip shıǵıp, rayondaǵı ishki kanallarda suw shıǵınların azaytıw ilajların kórmektemiz, – deydi Shımbay rayonı “Suw jetkerip beriw xızmeti” mámleketlik mákemesiniń direktorı Aydarbek Qadirbaev. – Aymaqlarǵa jetkerip berilgen suw muǵdarları belgilengen múddetlerde salıq esabatına kirgizilip barılmaqta.

Suw salıǵınıń 40 procenti esabınan qáliplestirilgen qarjılar esabınan cement hám sheben tas hám basqa da betonlaw ushın zárúr bolǵan materiallardıń rezervin jaratıp qoyǵan edik.

Mákememiz balansındaǵı kanallardıń 24 kilometr bólegin betonlaw rejelestirilgen. Házirgi waqıtqa shekem 15,75 kilometr bólegi betonlastırılıp, bul jumıslar shólkemleskenlik penen dawam ettirilmekte.

Itibarlısı, elimizde suw resurslarınan paydalanıw nátiyjeliligin arttırıw, suwdan paydalanıw mádeniyatın joqarılatıw arqalı xalıqtıń sanasında qáliplesken “suw – biypul” túsiniginen waz keshiwge qaratılǵan reformalar nátiyjesinde mine usınday ámeliy jumıslardıń orınlanıwına tiykar jaratılmaqta. Gúwası bolǵanımızday, sistemanıń nátiyjeli islewi nátiyjesinde “Suw jetkerip beriw xızmeti” mámleketlik mákemesiniń ekonomikalıq imkaniyatı óz esabındaǵı ishki kanallardı basqıshpa-basqısh betonlastırıwǵa tiykar jaratpaqta.

Qaraqalpaqstan Respublikası

Suw xojalıǵı ministrligi baspasóz xızmeti