Aldın xabar bergenimizdey, 21-fevral kúni Ózbekstan Respublikası Suw xojalıǵı ministri Sh.Xamraev “Kámbaǵallıqtan abadanlıqqa qaray” baǵdarlamasınıń orınlanıwın támiyinlew, yaǵnıy Qaraqalpaqstandaǵı máhálle hám awıllardaǵı qıytaq jer maydanlarına suw jetkeriw máselesin keńnen dodalap, juwapkerlerge tiyisli tapsırmalar bergen edi.

Búgingi kúnde Prezidentimizdiń 2024-jıl 23-sentyabrdegi “Kámbaǵallıqtan abadanlıqqa qaray” baǵdarlamasın ámelge asırıw boyınsha birinshi gezektegi ilajlar haqqında”ǵı qararı tiykarında barlıq rayonlarda kanal hám salmalardı tazalaw, betonlanatuǵın bólimleriniń joybarların tayarlaw jumısları alıp barılmaqta.

Shomanay rayonındaǵı “Tilenbay japt” kanalı “Qońırat arnawlı pudrat” JShJ tárepinen qazıp tazalanbaqta. Sonday-aq, rayondaǵı “Diyqanabad” awıl puqaralar jıyını aymaǵındaǵı “Laqali” kanalı da ekskavator tartılıp qazıw jumısları baslandı.

Qońırat rayonındaǵı “”Kokdarya” APJ aymaǵındaǵı “Maksim jap” ishki kanalı qazılmaqta.

Kegeyli rayonındaǵı “Janabazar,” Shımbay rayonınıń “Baxıtlı” awıl puqaralar jıyınlarındaǵı ishki kanallardı qazıp tazalaw jumısları baslandı.

Qaraqalpaqstan Respublikası Suw xojalıǵı ministri B.Juzbaev hár bir kúnniń aqırına barıp “Kámbaǵallıqtan abadanlıqqa qaray” baǵdarlaması sheńberinde rayonlarda ámelge asırılǵan jumıslardı dodalap barmaqta. Bul dodalawlarda jumıstı durıs shólkemlestire almaǵan rayon juwapkerleri qattı sınǵa alınıp, baǵdarlama sheńberindegi jumıslar hár kúni monitoring etip barılmaqta.

Qaraqalpaqstan Respublikası

Suw xojalıǵı ministrligi Baspasóz xızmeti