Ózbekstan Respublikası Suw xojalıǵı ministri Shavkat Hamraev Qaraqalpaqstanda suw resurslarınan nátiyjeli paydalanıw, únemli texnologiyalardı engiziw, kanallardı rekonstrukciyalaw suw resursların basqarıw sistemalarında 2028-jılǵa shekem erisiletuǵın tiykarǵı kórsetkishlerge baylanıslı usınıslardıń prezentaciyası menen tanıstı.
Qaraqalpaqstan Respublikası Suw xojalıǵı ministrliginde bolıp ótken prezentaciyaǵa “Suw xojalıqnazorat” inspekciyasınıń baslıǵı R.Raximov, Suw xojalıǵı ministrligi hám sistemadaǵı shólkemlerdiń basshıları qatnastı.
Ózbekstan Respublikası Suw xojalıǵı ministrliginiń basqarma baslıǵı, Qaraqalpaqstan Respublikası Suw xojalıǵı ministriniń orınbasarları, bólim hám sektor basshıları tiyisli baǵdarlar boyınsha prezentaciyalar ótkerdi.
Sonıń ishinde, suwdı únemleytuǵın texnologiyalardı engiziw baǵdarı boyınsha ámeldegi jaǵday haqqında málimleme berilip, 2028-jılǵa shekem ámelge asırılatuǵın ilajlar hám erisiletuǵın tiykarǵı kórsetkishler dodalandı.
Prezentaciyada atap ótilgenindey, suw xojalıǵı xızmetkerlerinen ibarat 64 suwǵarıw sistemaların montajlaw hám servis xızmetin kórsetiw toparlarınıń jumısı jetilistiriledi. Sonday-aq, 4 mıń 381 gektar paxta maydanlarında tamshılatıp suwǵarıw texnologiyasın qayta iske qosıw rejelestirilgen. Tarawda 1 ilimiy-izertlew, tájiriybe-konstruktorlıq jumısların ámelge asırıw hám ilimiy tiykarlanǵan metodikalıq qollanba hám usınıslar islep shıǵıladı.
Prezentaciyada Mámleketlik baǵdarlama sheńberinde kanallardı rekonstrukciyalaw (betonlaw) joybarı, suw obektlerin qayta tiklew, jıllıq elektr energiyasın hám suw resursların únemlew, ishki suwǵarıw tarmaqlarında ámelge asırılatuǵın ilajlar dodalandı.
2025-2030-jıllarda Qaraqalpaqstan Respublikasında ámelge asırılıwı rejelestirilgen sırt el investiciyalıq joybarları arqa rayonlardaǵı irrigaciya sistemaların rekonstrukciyalaw arqalı suwǵarılatuǵın jerlerdi kepillikli suw menen támiyinlew imkaniyatın jaratadı.
Sonday-aq, suwǵarıw sistemaların jıl dawamında jumıs islewshi jaǵdayda saqlaw hám dáwirlik mexanikalıq tazalaw jumısların ámelge asırıw maqsetinde suw xojalıǵı shólkemleri 7 dana zemsnaryadlar menen támiyinlenedi.
Qaraqalpaqstan Respublikası Suw xojalıǵı ministrliginde tarawdı sanlastırıw baǵdarı, mámleketlik nasos stanciyalarınıń nátiyjeliligin arttırıw, suw xojalıǵı tarawında mámleketlik-jeke menshik sheriklikti engiziw baǵdarında 2025-2026-jıllarda ámelge asırılatuǵın MJSh joybarları, qarjı qárejetleriniń jaǵdayı, perspektivası hám sistema shólkemlerinde rawajlandırıw qorına qarjı túsiriw, tómengi sistemada isleytuǵın suwshılardı qosımsha xoshametlewge qaratılǵan joybarlar boyınsha juwapkerler prezentaciya ótkerdi.
Prezentaciya dawamında Suw xojalıǵı ministri Sh.Xamraev hár bir joybardı óz aldına dodalap, óziniń usınısların bildirip ótti. Sonday-aq, juwapkerlerge usınılǵan joybarlardı jetilistiriw hám orınlanıwın támiyinlew boyınsha tapsırmalar berildi.
Qaraqalpaqstan Respublikası
Suw xojalıǵı ministrligi baspasóz xızmeti