Prezidentimizdiń basshılıǵında 2024-jıldıń 7-noyabr kúni ótkerilgen videoselektor májilisinde 2025-jıl – suw xojalıǵında “Nasoslar nátiyjeliligin arttırıw jılı” bolıwı belgilengen edi.
Búgingi kúnde Suw xojalıǵı ministrligi qaramaǵındaǵı nasoslardıń nátiyjeliligin arttırıw, az energiya menen kóbirek suw shıǵarıw boyınsha keń kólemli jumıslar ámelge asırılmaqta hám ilajlarǵa ilimpazlar da tartılǵan.
Qaraqalpaqstan Respublikası Suw xojalıǵı ministrligi janındaǵı Qaraqalpaqstan nasos stanciyaları hám energetika basqarması qaramaǵında házirgi kúnde 303 dana SNPE-500/10 markalı nasoslardan paydalanıladı. Qánigelerdiń málim etiwinshe, bul nasoslar elektr energiyasınıń jumsalıwı joqarı bolıp, tolıq quwatlılıqta islegende saatına 110 kVt elektr energiyasın jumsaydı.
Qaraqalpaqstan nasos stansiyaları hám energetika basqarması usı markadaǵı nasoslardıń alternativ bolǵan zamanagóy, energiya únemlewshi “SHIMGE” markalı nasoslarǵa almastırıw ilajların orınlamaqta. “SHIMGE” markalı nasoslar Qıtay mámleketinde islep shıǵarılǵan bolıp, 18,5 kVt elektr quwatlıǵındaǵı elektr-dvigateller menen úskenelengen hám sekundına 277 litr suw shıǵarıwǵa mólsherlengen.
Sol sebepli Basqarma tárepinen bir neshe rayonlarda “SNPE-500/10” markalı nasoslar ornına “SHIMGE” markalı nasoslar ornatılǵan hám olardı “Jasıl energetika” ótkeriw, elektr energiyasın ele de únemlew maqsetinde quyash fotoelektr stanciyaları qurılǵan.
Házirgi kúnde Qaraqalpaqstan nasos stansiyaları hám energetika basqarmasınıń buyırtpası tiykarında Irrigaciya hám suw mashqalaları ilimiy-izertlew institutında “SNPE 500/10 markalı nasos agregatınıń alternativı sıpatında usınıs etilip atırǵan SHIMGE nasos agregatın úyreniw hám engiziw boyınsha usınıslar islep shıǵıw” boyınsha ilimpazlar ilimiy-izertlew jumısların alıp barmaqta.
Irrigaciya hám suw mashqalaları ilimiy-izertlew institutınıń “Nasos stanciyaları hám elektr energiyası” laboratoriyasınıń baslıǵı J.Narziev, usı instituttıń Qaraqalpaqstan regionallıq orayınıń baslıǵı S.Qurbanbaev, úlken ilimiy xızmetker B.Ulıǵbekov, doktorantlar F.Amanullaxanov, U.Kidrbaev, Sh.Nurekeshov, J.Kadirovlar Qanlıkól, Nókis, Kegeyli hám Qaraózek rayonlarındaǵı nasos stanciyalarında elektr energiyasın únemlew hám suw resurslarınan nátiyjeli paydalanıw boyınsha ilimiy-ámeliy izertlewler alıp bardı.
– Izertlew dawamında hár bir nasos stansiyasına ornatılǵan zamanagóy, energiya únemlewshi “SHIMGE” markalı nasoslardan shıǵarılıp atırǵan suwdıń jumsalıwı hám basqa da bir qansha kórsetkishler úyrenildi, – deydi Irrigaciya hám suw mashqalaları ilimiy-izertlew institutınıń “Nasos stanciyaları hám elektr energiyası” laboratoriyasınıń baslıǵı J.Narziev. – Atap aytqanda, basımlı qubırlarda suwdıń jumsalıwın ólshew AFT-2000N markalı lazerli portativ qurılması arqalı hám suw alıp keliwshi kanallardaǵı suwdıń jumsalıwları SONTEK S5 markalı dopler-profilograf járdeminde anıqlanadı.
“SNPE 500/10” markalı nasos agregatınıń alternativ sıpatında paydalanılıp atırǵan “SHIMGE” nasos agregatınıń nátiyjeliligin bahalaw maqsetinde izertlew nátiyjeleri salıstırıldı hám analitikalıq juwmaqlar tayarlanbaqta.
Maǵlıwmat ushın ilimpazlar tárepinen izertlewler Qanlıkól rayonındaǵı “Azamat,” Nókis rayonındaǵı “Kattagar,” Kegeyli rayonındaǵı “Kókózek,” Qaraózek rayonındaǵı “Esimózek” nasos stansiyaları hám olarǵa suw alıp keliwshi kanallarda alıp barılǵan.
Itibarlısı, nasoslardıń nátiyjeliligin arttırıw jumısına ilimpazlar da tartılıp, ilimiy juwmaqlar tiykarında eń nátiyjeli hám kem energiya menen kóbirek suw shıǵarıp, alıs awıllarǵa shekem suw jetkeriw boyınsha barlıq birdey háreket etpekte.
Qaraqalpaqstan Respublikası
Suw xojalıǵı ministrligi baspasóz xızmeti