Тўрткўл туманидаги “Янбош” каналининг реконструкция ишлари билан танишиш ҳамда бу борадаги ишларни жадаллаштириш бўйича объектда амалга оширилаётган ишлар ўрганилди ҳамда вазифалар белгилаб олинди. 

     Ўрганиш давомида Қорақалпоғистон Республикаси Сув хўжалиги вазирлиги, буюртмачи “Қорақалпоғистонсувқурилишинвест” ДМ ва қурувчи ташкилот “Бунёдкор Жанубий СКБ” масъулияти чекланган жамиятининг масъул ходимлари иштирок қилди. Тадбир иштирокчилари каналнинг реконструкция қилинаётган қисмида бўлиб, амалга оширилаётган ишлар билан яқиндан танишдилар.

     Тўрткўл туманидаги “Янбош” хўжаликлараро канали 1985 йилда қурилиб фойдаланишга топширилган. Узунлиги 43,5 километрни ташкил қилиб, лойиҳавий сув ўтказиш қобилияти 52 м3/сек. Канал “Ўнг қирғоқ” магистрал каналининг ПК 310+00 да жойлашган  гидротехник иншоотидан сув олади.

     Буюртмачи “Қорақалпоғистонсувқурилишинвест” ДМ бош муҳандиси Н.Каипов “Янбош” каналини реконструкция қилиш бўйича амалга ошириладиган ишлар юзасидан атрофлича маълумотлар бериб ўтди. Жумладан, бетонлаш ишларини янада жадаллаштириш, канал қирғоқларига ётқизилаётган бетон ҳажмларининг сифатига алоҳида эътибор бериб, ҳар ҳафта лаборатория-синов натижаларини олиш ҳамда об-ҳавонинг кескин совуқ кетишидан олдин бетонлаш ишларини икки сменада ташкил қилиш бўйича пудратчи ташкилот раҳбари Д.Юсупов ҳамда техник назоратчи А.Мавлоновларга топшириқлар берилди. 

     Мазкур каналнинг белгиланган қисмида реконструкция ишлари бажарилгандан кейин каналининг лойиҳавий қобилятини 45 м3/сек.га кўтарилади ва 18 950 гектар ер майдонларнинг сув таъминоти яхшиланади. Шунингдек, 501 гектар ер майдони қайта фойдаланишга киритилиши натижасида янги иш ўрни яратилиб, аҳолини иш билан таъминлаш имконияти оширилади.

     “Янбаш” канали орқали туманнинг “Қумбасқан”, “Пахтаобод”, “Янбошқалъа”, “Кўкча”, “Наврўз” ОФЙ ҳудудларидаги фермер хўжаликлари ва аҳолининг томорқа  майдонлари сув билан таъминланади.

     Айни пайтда ушбу объектда 2 та эксковатор, 2 дона автомиксер, 2 дона сув ташувчи машина 2 та бошқа махсус техникалар ҳамда 16 нафар ишчи ходимлар канални реконструкция қилиш ишига жалб қилинган. Ўтказилган тадбирда бу борада техника ва ишчиларни кўпроқ жалб қилган ҳолда реконструкция ишларини жадаллаштириш, жорий йилга режалаштирилган бетонлаш ишларини тез кунда  якунлаш бўйича вазифалар белгиланди.

 Қорақалпоғистон Республикаси

Сув хўжалиги вазирлиги Матбуот хизмати