Юртимизда давом этаётган пандемия туфайлими, кўпчилик аҳолининг, шу жумладан ёшларнинг ҳам кайфияти юқори эмас эди. Лекин, куни кеча Ёшлар куни муносабати билан Президентимизнинг йўллаган табриги миллионлаб ёшларга байрамона кайфият бахш этди, шу жумладан менинг ҳам шижоатимни оширди.

Айниқса, Давлатимиз раҳбарининг “Бугунги кунда мамлакатимизда янги Ўзбекистонни барпо этишга қаратилган ижтимоий-сиёсий, иқтисодий ислоҳотларни амалга оширишда азму шижоатли ёшларимизнинг ўрни ва таъсири тобора ортиб бораётгани ҳаммамизни қувонтиради”, – деган эътирофлари мени  янги марралар сари руҳлантирди ва ўз ишимга бўлган масъулиятимни оширди.

Негаки, биз каби ёшларга бугун Президентимиз катта ишонч билдирмоқда. Ўзим Тошкент ирригация ва қишлоқ хўжалигини механизациялаш муҳандислари институтини тамомлаганман.  Жорий йил бошида “Қаттағар-Бўзатов”  ирригация тизими бошқармасида иш бошлаган эдим. Куни кеча Ёшлар куни мен учун қўшалоқ байрам бўлди, десам муболаға эмас. Шу куни  Қорақалпоғистон Республикаси Сув хўжалиги вазирлиги маъмурий аппаратида масъул лавозимлардан бирига ишга қабул қилиндим. Ихтисослигим ҳам сув хўжалиги ва мелиорация йўналиши бўлганлиги учун бу тизимни мукаммал ўрганишга ҳаракат қилмоқдаман.

Келгуси фаолиятимда, Муҳтарам Президентимизнинг “Азиз ўғил-қизларим, ҳеч қачон унутманг, халқимиз, Ватанимиз сизлардан буюк ишларни кутмоқда”,  – деган даъватини ҳамиша ёдда тутаман. Институтда олган билимларимни амалиётда бойитиб, янада кўпроқ тажриба тўплаб, ўзимнинг бор салоҳиятимни сув хўжалиги тизимини ривожлантиришга сарфлайман.