___ Аввал хабар берганимиздек, Қорақалпоғистонда сув хўжалиги тизимидаги муҳим вазифалар юзасидан “Долзарб 5 кунлик” эълон қилинди ва айни вақтда ушбу тадбир доирасида туманларда ишлар ташкил этилмоқда.
___ Бугун, яъни 5 январь куни Ўзбекистон Республикаси Сув хўжалиги вазирлигининг бошқарма бошлиғи, вазирликдан ҳудудга бириктирилган вакил Қ.Муротов Хўжайли туманида “Долзарб 5 кунлик” доирасида амалга оширилаётган ишлар билан танишди.
___ -Бугунгидек яхши об-ҳавода экскаваторлар бир дақиқа тўхтатмасдан каналларимизни қазиб-тозалашнинг барча чораларини кўрмоқдамиз, – дейди Хўжайли тумани ирригация бўлими бошлиғи Э.Қалмуратов. – Ҳозир ҳудудимизда 7 та экскаватор хўжаликлараро каналларни қазиб тозалаётган бўлса, ички ариқларни тозалаш ишларига кластер ва фермер хўжаликларини ҳам жалб қилганмиз. 2022-2023 йил куз-қиш тадбирлари режасига кўра, бугунги кунга қадар 4,6 километр узунликдаги хўжаликлараро каналларда қазиш ишлари ҳамда 2 дона гидротехник иншоотлар, 2 дона гидропостларда таъмирлаш ишлари бажарилди. Шунингдек, кластерлар ва фермер хўжаликлари томонидан 55,8 километр узунликдаги ички каналларда қўл кучи ва механизм ёрдамида қазиб-тозалаш ишлари олиб борилди.
___ Бугун эълон қилинган “Долзарб 5 кунлик” тадбири бу борадаги ишларимизни янада жадаллаштиришга хизмат қилади, албатта. Айниқса, шу тадбир доирасида вазирликдан келган вакиллар гидротехник иншоотлар ва постларни ўрнатиш бўйича берган кўрсатмалари амалга оширадиган ишларимизга муҳим дастуриламал бўлди.
___ Ишчи гуруҳ аъзолари тумандаги экскаваторларнинг иш жараёнлари ҳамда ирригация бўлимида тайёрланган гидротехник иншоотларни бориб кўрди. Экскаваторлар ташқарига олиб чиқараётган муз бўлаклари ва тупроқ тўнглаган қатламининг қалинлиги ўтган ойдаги кескин совуқдан далолат бериб турарди.
___ Шу боис бугунги ҳаво-ҳарорати юмшаган кунларнинг ҳар бир дақиқасидан унумли фойдаланиш зарурлиги яна бир бор уқтирилди. Гидроиншоотларни ҳамда гидропостларни ўрнатиш бўйича тегишли кўрсатмалар берилиб, ҳудудларда шўр ювишга ер тайёрлаш, ички ариқларни тозалаш бўйича фермер хўжаликлари билан биргаликда ҳашарлар ташкил қилиш тавсия этилди.
Ғ.Отажонов,
Қорақалпоғистон Республикаси
Сув хўжалиги вазирлиги матбуот котиби