15-oktyabr – Awıl hayal-qızları kúni. Bul sáne awıl hám máhállelerde miynet etip, túrli tarawlardıń rawajlanıwına múnásip úles qosıp atırǵan hayal-qızlardıń pidákerlik miynetin jáne bir márte tán alıwǵa xızmet etedi.
Qońırat rayonı «Suw jetkerip beriw xızmeti» mámleketlik mákemesinde búgingi kúnde 15 hayal-qız erkek kásiplesleri menen iyinles bolıp miynet etip kelmekte. Olardıń arasında suw xojalıǵı tarawında 17 jıldan aslam tájiriybege ie qánige – Alimbetova Gulnur Egisbaevna da bar.
Gúlnur 2005-jılı Qońırat rayonındaǵı 53-sanlı ulıwma bilim beriw mektebin tamamlap, Tashkent irrigaciya hám melioraciya institutınıń Gidromelioraciya fakulteti, «Suw resursların basqarıw» baǵdarına oqıwǵa kirdi. 2009-jılı joqarı bilimlendiriwdi tamamlap, miynet jolın suw xojalıǵı sistemasında basladı.
Onıń kásiplik jumısında ustaz-shákirt dástúri de áhmietli orın ieleydi. Dáslepki jumıs jıllarında ustazı Sultanbay Berdimuratovtan tarawdıń ózine tán tárepleri, jumıs processleri hám ámeliy kónlikpelerdi úyrendi. Búgin bolsa ózi arttırǵan tájiriybesin jas qánigelerge úyretip kelmekte.
Miynet jolı dawamında injener-gidrotexnik, bas gidrometr lawazımlarında islep, suw resursların esapqa alıw, suw muǵdarın ólshew hám bólistiriw sıyaqlı juwapkershilikli wazıypalardı orınladı. Házirgi waqıtta suw resurslarınan paydalanıw baǵdarında bas qánige sıpatında jumıs alıp barmaqta.
Qońırat rayonı suw xojalıǵı sistemasında miynet etip atırǵan hayal-qızlar da hár kúni kanallar boylap, awıllar aralap, fermer xojalıqları hám xalıqtıń qıytaq jerlerine suw jetkerip beriw, onıń esabın júrgiziw sıyaqlı áhmietli wazıypalardı shın kewilden orınlamaqta.
Usı mánide, 15-oktyabr – Awıl hayal-qızları kúni suw xojalıǵı tarawında miynet etip atırǵan suwshı hayal-qızlardıń mashaqatlı hám abıraylı miynetin tán alıw ushın da múnásip pursat bolıp esaplanadı.
Barlıq awıl hayalların, atap aytqanda, suw xojalıǵı sistemasında miynet etip atırǵan pidayı hayal-qızlardı Awıl hayalları kúni menen qızǵın qutlıqlaymız!
Ǵ.Atajanov,
Qaraqalpaqstan Respublikası Suw xojalıǵı ministrliginiń baspasóz xatkeri.