___Қорақалпоғистон Республикаси Сув хўжалиги вазирлигининг тизим ташкилотларида куз-қиш мавсумидаги таъмирлаш ишлари давом эттирилмоқда. Бунда насос агрегатларини вегетация давригача таъмирлаб, соз ҳолатга келтириб қўйишга алоҳида эътибор қаратилаяпти.  

___– Бугунги кунгача бошқарма балансидаги 34 дона ва ички хўжаликлар ҳисобидаги 12 дона насос агрегатлари  жорий таъмирланди,  – дейди Қорақалпоғистон насос станциялари ва энергетика бошқармасининг насос қурилмаларини таъмирлаш ва фойдаланишни ташкил этиш бўйича муҳандис-механиги Самат Тургалиев. – 2021-2022 йиллар куз-қиш мавсумида бошқармамизга қарашли жами 103 дона агрегатларни жорий таъмирлаш ҳамда ички хўжаликлар ҳисобидаги 46 та насосларни таъмирлаш  белгиланган.

___Барча ишлар бошқарма қошида ташкил этилган насос, электродвигатель ва бошқа механик асбоб-ускуналарни таъмирлаш цехи ишчи-ходимлари томонидан олиб борилмоқда.

___Насос агрегатлари, электродвигателлар ва қувурларини таъмирлашда автокран бошқарувчилари Инаят Халмуратов, Батир Дженалиев, Азат Нурумбетов, юк автотранспорти ҳайдовчилари Турганбай Ешанов, Камилжан Ауезбаев, таъмирлаш цехи электрогаз пайвандчилари Серик Муратов, Нурлан Пухарбаевлар ишларнинг ўз вақтида ва сифатли бажарилишига катта ҳисса қўшмоқда.

Ғ.Отажонов,

Қорақалпоғистон Республикаси

Сув хўжалиги вазирлиги матбуот котиби