Тахтакўпир туманидаги “Эски Қуваниш жарма” каналини реконструкция қилиш, яъни бетонлаштириш ишлари қизғин давом этмоқда.

  Ўзбекистон Республикаси Вазирлар Маҳкамасининг тегишли қарори асосида ушбу объектга 9 миллиард сўм маблағ ҳисобига 6,3 км узунликдаги канални бетонлаштириш режалаштирилган эди. Қорақалпоғистон Республикаси Вазирлар Кенгашининг 2025 йил 23 январдаги “Қорақалпоғистон Республикаси Тахтакўпир туманидаги “Эски Қуваниш жарма” каналини реконструкция қилиш объекти бўйича тақдим этилган таклифларни кўриб чиқиш ва ғолибни аниқлаш бўйича танлов комиссияси мажлисининг” 1-25-сонли баённомаси асосида “Эллиқалъамахсуссувпудрат” МЧЖ бош пудратчи этиб тайинланди ва жорий йил январь ойида каналда реконструкция ишлари бошланди.

    -Мавсум бошидан суғориш мавсумигача каналнинг 4 километрдан ортиқ  қисми бетонланган эди, – дейди қурилиш ташкилотининг участка бошлиғи Тажибоев Юсупбой. – Албатта, бетонланган каналда сувнинг тезлиги ортади. Томорқа майдонларига сув очаётган аҳоли ҳамда бошқа сув истеъмолчилари каналда амалга оширилаётган реконструкция ишларидан миннатдор бўлишмоқда. Улар сув йўқотишларнинг камайиши ва сув таъминотини яхшилашга хизмат қиладиган бу каби лойиҳаларга маблағ ажратаётган ҳукуматимиздан ҳам миннатдор бўлишмоқда.

    Биз, қурувчилар кузнинг қулай об-ҳавосидан фойдаланиб бетонлаш ишларини жадаллаштирганмиз. Бунинг учун махсус техника ҳамда ишчи кучларини етарли миқдорда сафарбар қилиб, белгиланган муддатларда реконструкция ишларини якунлашнинг барча чораларини кўрмоқдамиз.

   Ҳозирги кунда “Эски Қуваниш жарма” каналини бетонлаштириш ишлари қизғин давом этмоқда. Объектда 1 октябргача 7537,5 млн.сўмлик қурилиш монтаж ишлари йиллик лимитга нисбатан 86 фоизга бажарилиши кутилмоқда. Жорий йилнинг 1 декабрига қадар эса, каналда бетонлаш ишлари якунланиб, объектни фойдаланишга топшириш режалаштирилган.

Қорақалпоғистон Республикаси

Сув хўжалиги вазирлиги Матбуот хизмати